Kadoras ba Dame

Kadoras ba Dame

Husi unuk we’e moris,

hananu tuir kadoras fó hari’is fatuk be namorok hela,

tan rai banan sasunuk nor loromanas,

minutu manas dadaun ba oras,

halo ema hotu nia kadoras sai matadalan dame...

koto fuik dai tuir du’ut maran nia leten sira,

ne’ebe moris deit iha ailaran tuan,

hakmaus sentru moris.

norik la tudak namalerek ba dame,

basa dame mai ranesan we’e suli....

Behu lian tau iha mama fatin,

sikat ba aisasu’uk dame iha fu’uk kabulin,

empresta ba lian Timór hodi narihik,

ho maho wen dade’er ba Mundu tomak……

hakuak metin Timór ho liman sanak sanulu,

tilun la kole atu rona aiknananu’uk natureza,

inus horon Timór nia morin nakonu ho aikameli,

lian laloran lori dame hari’is rai Timor.....

Lafaek nia illas Jaco,

kruit tan hare’e Atauru no Oe-Cusse,

hawenok tan kadoras la lori we’e suli….

Timór iha Jardim nurak halo insektu sira,

iha esperansa bo’ot tebes,

ho matak be nahelik sira nia isin lolon,

tan hare’e amigu sira nu’udar inimigu,

maibé!  ohin kadoras sai matadalan dame,

lori we’e turuk ba rai doben Timor leste.....

                                                                                    @ Apeu Mesquita Babo

 Dili (Manleuana),16/03/2013 – 19:22pm

Notas: liuhusi poema ida ne’e hakarak  fó inspirasaun ba foinsa’e iha rai doben Timór  loro sa’e ne’ebé agora ne’e moris iha nakukun nia laran, tan ne’e hau nu’udar jovem ne’ebe sai aswain di’ak ba futuru nasaun, tan ne’e hau dezenvolve puizia ida ne’e ho nia títulu katak “kadoras ba dame” jovem agora tenke sai ponte atu liga ema hotu nia dame ho we’e suli Timor nian.